konosuke matsushita
ໂກໂນຊຸເກະ ມັຕສຸຊິຕະ
ປະຫວັດ ແລະຄວາມເປັນມາໃນໄວເດັກຂອງ: ໂກໂນຊຸເກະ ມັຕສຸຊິຕະ ຊຶ່ງເກີດວັນທີ 27 ເດືອນພະຈິກ ປີ 1894 ເປັນລູກຊາຍຫຼ້າໃນຈໍານວນລູກແປດຄົນຂອງທ່ານ ມາຊາກຸຊຸ ຊຶ່ງແມ່ນຊາວນາຮັ່ງມີແລະໂຕກຸເອະ ຜູ້ເປັນເມຍ ຢູ່ເຂດຊົນນະບົດຂອງກໍາແພງນະຄອນວາກາຢາມະ ເປັນເຂດກະສິກໍາຢູ່ຕາເວັນອອກສ່ຽງໃຕ້ຂອງໂອຊາກະ.
ພໍ່ຂອງລາວແມ່ນສະມາຊິກສະພາທ້ອງຖິ່ນ ແລະເຮັດວຽກໄລຍະໜຶ່ງຢູ່ຫ້ອງການປົກຄອງຂອງບ້ານ. ຄອບຄົວຂອງມັຕສຸຊິຕະຂ້ອນຂ້າງມີຖານະດີ ມີດິນຄອບຄອງ ຊຶ່ງເປັນມໍລະດົກຕົກທອດມາໄດ້ຫຼາຍເຊັ່ນຄົນ. ຕອນຕົ້ນຂອງສະໄໝໄວເດັກຂອງໂກໂນຊຸເກະມີຄວາມສຸກແລະໄຮ້ກັງວົນ.
ແຕ່ໃນປີ 1899 ຄອບຄົວນີ້ຕົກຢູ່ໃນວິກິດແສນສາຫັດ. ສົງຄາມລະຫວ່າງຈີນ-ຍີ່ປຸ່ນ ໃນປີ 1899-95 ພາໃຫ້ເກີດຍຸກເຕີບໂຕທາງເສດຖະກິດຕາມມາ ແລະມີການຈັດຕັ້ງການແລກປ່ຽນຫຸ້ນແລະສິນຄ້າຕ່າງໆທົ່ວປະເທດ ຊຶ່ງແມ່ນວິທີການໜຶ່ງໃນການກະຕຸ້ນອຸດສາຫະກໍາໃນທ້ອງຖິ່ນ. ຫຼາຍຄົນພາກັນເຫີ່ກັບການເກັງກໍາໄລ ແລະພໍ່ຂອງໂກໂນຊຸເກະກໍແມ່ນຄົນໜຶ່ງໃນຈໍານວນຄົນເຫຼົ່ານັ້ນ. ຫຼັງຈາກທີ່ລາວເລີ່ມລົງທຶນໃສ່ການແລກປ່ຽນຫຸ້ນຢູ່ໃນທ້ອງຖິ່ນ ຄວາມຫາຍຍະນະກໍເກີດຂຶ້ນ ຕະຫຼາດລົ້ມລະລາຍ ມາຊາກຸຊຸສູນເສຍຫຸ້ນສ່ວນທັງໝົດຂອງຕົນ ລວມທັງເຮືອນແລະທີ່ດິນຂອງບັນພະບຸລຸດ.
ສິ່ງທີ່ຕາມມາຈາກຄວາມຫາຍຍະນະໃນຄັ້ງນັ້ນ ຄືທັງອ້າຍສອງຄົນຂອງໂກໂນຊຸເກະ ແລະມາຊາກຸຊຸ ກໍບໍ່ສາມາດນໍາພາຄອບຄົວໃຫ້ຫຼຸດພົ້ນອອກຈາກຄວາມທຸກຍາກດ້ວຍຕົນເອງໄດ້ ຜູ້ເປັນພໍ່ຈຶ່ງຕັ້ງຄວາມຫວັງໄວ້ກັບໂກໂນຊຸເກະ ໃນໄວສີ່ຂວບ ຊຶ່ງຈະເປັນຜູ້ສືບທອບຕະກູນມັຕສຸຊິຕະ.
ความคิดเห็น