ກອງປະຊຸມໃຫຍ່ອົງຄະນະພັກແຂວງສະຫວັນນະເຂດ ຄັ້ງທີ IX ໄຂຂຶ້ນຢ່າງເປັນທາງການແລ້ວ
ຕອນເຊົ້າວັນທີ 20 ພະຈິກ 2020 ທີ່ຫໍວັດທະນະທຳໄກສອນພົມວິຫານ ແຂວງສະຫວັນນະເຂດ ໄດ້ໄຂກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງຂຶ້ນ ພາຍໃຕ້ຄຳຂັວນ ຍົກສູງຄວາມສາມາດນຳພາຂອງພັກ,ເສີມຂະຫຍາຍມູນເຊື້ອຄວາມສາມັກຄີປອງດອງ, ສຸມທຸກກຳລັງແຮງຫັນກະສິກຳ - ປ່າໄມ້ ເປັນທັນສະໄໝ ຕາມທິດຍືນຍົງ, ພັດທະນາແລວເສດຖະກິດໃຫ້ເປັນສູນກາງການບໍລິການຂອງພາກພື້ນ ສ້າງແຂວງສະຫວັນນະເຂດໃຫ້ເຂັ້ມແຂງໜັກແໜ້ນ ປະຊາຊົນມີຄວາມຜາສຸກ. ໂດຍການເປັນປະທານກອງປະຊຸມຂອງ ສະຫາຍ ສັນຕິພາບ ພົມວິຫານ ກຳມະການສູນກາງພັກ ເລຂາຄະນະບໍລິຫານງານພັກແຂວງສະຫວັນນະເຂດ
ໃຫ້ກຽດເຂົ້າຮ່ວມຂອງສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປລາວ ບັນດາສະຫາຍຜູ້ແທນສົມບູນທັງໝົດຈຳນວນ 455 ສະຫາຍ, ຍິງ 79 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວແຂວງ ຈຳນວນ 29.075 ສະຫາຍ ຍິງ 6.810ສະຫາຍ.
ສະຫາຍ ສັນຕິພາບ ພົມວິຫານ ກຳມະການສູນກາງພັກ ເລຂາຄະນະບໍລິຫານງານພັກແຂວງສະຫວັນນະເຂດ ໄດ້ກ່າວໄຂກອງໃຫຍ່ຢ່າງເປັນທາງການ ແລະ ກໍໄດ້ຜ່ານບົດລາຍງານການເມືອງທັງສອງພາກ ພ້ອມທັງຕີລາຄາຄືນຜົນຂອງການຈັດຕັ້ງມະຕິກອງປະຊຸມຄັ້ງທີ 8 ຂອງອົງຄະນະພັກແຂວງ. ເຮັດໃຫ້ແຂວງສະຫວັນນະເຂດມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ເສດຖະ ກິດຂະຫຍາຍຕົວຕາມແຜນການທີ່ວາງໄວ້, ວັດທະນະທຳສັງຄົມໄດ້ຮັບການພັດທະນາ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ, ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍໄດ້ຮັບການຈັດຕັ້ງປະຕິບັດຢ່າງທົ່ວເຖິງ, ກົງຈັກການຈັດຕັ້ງຂອງ ພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະອົງການຈັດ ຕັ້ງສັງຄົມແຕ່ລະຂັ້ນໄດ້ຮັບການປັບປຸງດີຂຶ້ນ.
ສຳລັບວຽກງານກໍ່ສ້າງພັກ-ພະນັກງານ ໄດ້ເອົາໃຈໃສ່ນໍາພາກໍ່ສ້າງ ແລະ ປັບປຸງການຈັດຕັ້ງຮາກຖານພັກໃຫ້ມີຄວາມໜັກແໜ້ນ, ເຂັ້ມແຂງ ເຮັດໃຫ້ການຈັດຕັ້ງພັກເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ, ສາມາດເປັນແກນນຳໃນລະບົບການເມືອງຢູ່ແຕ່ລະຂັ້ນ; ທົ່ວແຂວງມີ 227 ຄະນະພັກຮາກຖານ, ເພີ່ມຂຶ້ນ 26 ຄະນະພັກຮາກຖານ ແລະ ມີ 1ພັນ 939 ໜ່ວຍພັກ, ເພີ່ມຂຶ້ນ 280 ໜ່ວຍພັກ; ໃນນີ້, ໄດ້ຮັບຮອງເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ແລະ ໜ່ວຍພັກປອດໃສ ເຂັ້ມແຂງ ໜັກແໜ້ນ ລວມທັງໝົດ 1ພັນ 654 ໜ່ວຍ ເທົ່າກັບ 85% ທຽບ ໃສ່ສະໄໝຜ່ານມາ ເພີ່ມຂຶ້ນ 637 ໜ່ວຍ, ຂະຫຍາຍສະມາຊິກພັກໃໝ່ 6ພັນ 773 ສະຫາຍ; ມີສະມາຊິກພັກທັງໝົດ 29ພັນ 75 ສະຫາຍ, ຍິງ 6ພັນ 810 ສະຫາຍ; ໃນນັ້ນສະມາຊິກພັກສົມບູນໄດ້ຮັບບັດສະມາຊິກພັກ 79%, ໄດ້ນຳພາດຳເນີນປັບປຸງປົວແປງພັກ ສາມາດເສີມຂະຫຍາຍໄດ້ລັກສະນະນຳໜ້າ ແລະ ຄວາມສາມັກຄີເປັນເອກະພາບຂອງອົງຄະນະພັກ. ອັນພົ້ນເດັ່ນກໍແມ່ນການສ້າງບ້ານປ້ອງກັນຊາດເຂັ້ມແຂງ ໄດ້ 968 ບ້ານ, ບ້ານປ້ອງກັນຄວາມສະຫງົບດີ ໄດ້ 676 ບ້ານ ແລະ ບ້ານປອດຢາເສບຕິດ ໄດ້ 162 ບ້ານ. ໄດ້ຖືເອົາການພັດທະນາເສດຖະກິດເປັນໃຈກາງ ດ້ວຍການສຸມທຶນຮອນ ແລະ ປຸກລະດົມທຸກພາກສ່ວນເຂົ້າຮ່ວມໃນການປະຕິບັດບັນດາໂຄງການຕ່າງໆໄດ້ວາງອອກເປັນຕົ້ນແມ່ນສຸມໃສ່ແກ້ໄຂຄວາມທຸກຍາກຂອງປະຊາຊົນ, ຫັນການຜະລິດແບບທຳມະຊາດເຄິ່ງທຳມະຊາດໄປສູ່ການຜະລິດເປັນສິນຄ້າເທື່ອລະກ້າວ;
ສ້າງເງື່ອນໄຂເອື້ອອຳນວຍຄວາມສະດວກໃຫ້ນັກທຸລະກິດ, ຜູ້ປະກອບການທັງພາຍໃນ ແລະ ຕ່າງປະ ເທດ ເຂົ້າຮ່ວມໃນການລົງທຶນພັດທະນາແຂວງນັບມື້ນັບຫຼາຍຂຶ້ນ, ເສດຖະກິດຂອງແຂວງຂະຫຍາຍຕົວ ສະເລ່ຍໃນລະດັບ 8,53% ຕໍ່ປີ, ລວມຍອດຜະລິດຕະພັນພາຍໃນ (GDP) ຮອດປີ 2020 ບັນລຸໄດ້ 19ພັນ 955 ຕື້ກ່ວາກີບ, ສະເລ່ຍລາຍຮັບຕໍ່ຫົວຄົນ 19 ລ້ານກວ່າກີບຕໍ່ຄົນຕໍ່ປີ ຫຼື ເທົ່າກັບ 2ພັນ ໜຶ່ງຮ້ອຍ ກ່ວາໂດລາສະຫະລັດຕໍ່ຄົນຕໍ່ປີ ( ອັດຕາແລກປ່ຽນໃນເດືອນ ຕຸລາ 2020 ) ທຽບໃສ່ 5 ປີຜ່ານມາເພີ່ມຂຶ້ນ 351ໂດລາສະຫະລັດ ເທົ່າກັບ 19,66% ເກັບລາຍຮັບເຂົ້າງົບປະມານເພີ່ມຂຶ້ນ 26,17%; ການຄຸ້ມຄອງລາຍຈ່າຍຫັນເຂົ້າສູ່ການປະຢັດຢ່າງເຂັ້ມງວດ.
ການຄໍ້າປະກັນສະບຽງອາຫານໃນ 05 ປີ ຜ່ານມາສາມາດຜະລິດເຂົ້າ ສະເລ່ຍ 7- 8 ແສນໂຕນຕໍ່ປີ ເທົ່າກັບ 80%ຂອງແຜນການ, ສະເລ່ຍໃສ່ພົນລະເມືອງໄດ້ 725 ກິໂລ/ຄົນ/ປີ, ນອກຈາກນີ້ໄດ້ຜະລິດຊີ້ນ ປາ ແລະ ໄຂ່ ເຊິ່ງສາມາດສະໜອງສະບຽງອາຫານໄດ້ພຽງພໍກັບການບໍລິໂພກພາຍໃນ; ການຜະລິດກະສິກໍາເປັນສິນຄ້າກໍໄດ້ມີການຂະຫຍາຍຕົວ ເຮັດໃຫ້ປະຊາຊົນມີລາຍຮັບເພີ່ມຂຶ້ນ; ອັນພົ້ນເດັ່ນ: ສາມາດສ້າງໄດ້ຄອບຄົວຕົວແບບໃນການປູກ, ການລ້ຽງ ໄດ້ 216 ຄອບຄົວ, ສ້າງຕັ້ງກຸ່ມຜະລິດເປັນສິນຄ້າໄດ້ 506 ກຸ່ມ, ອຸດສາຫະກໍາ ແລະ ການຄ້າ ໄດ້ຮັບການປັບປຸງ ແລະ ສົ່ງເສີມ, ວິສາຫະກິດຂະໜາດນ້ອຍ ແລະ ກາງໄດ້ຂະຫຍາຍຕົວເພີ່ມຂຶ້ນ, ພື້ນຖານໂຄງລ່າງ ແລະ ການບໍລິການຄົມມະນາຄົມ, ຂົນສົ່ງ ໄດ້ຮັບການປັບປຸງກໍ່ສ້າງອອກສູ່ຊົນນະບົດ, ເສັ້ນທາງແຕ່ເທດສະບານແຂວງຫາບັນດາເມືອງສາມາດທຽວໄດ້ 2 ລະດູທຸກໆເມືອງ, ທາງປູຢາງແຕ່ເທດສະບານແຂວງຫາເມືອງ ເພີ່ມຂຶ້ນ 2 ເມືອງ, ມາຮອດປັດຈຸບັນເສັ້ນທາງແຕ່ເມືອງຫາບ້ານທຽວໄດ້ 2 ລະດູ ກວມເອົາ 80%; ໄດ້ສ້າງກັນຕະຝັ່ງເຈື່ອນແຄມຂອງໄລຍະທີ 1 ສໍາເລັດ 95,5 %, ພ້ອມກັນນີ້ຍັງໄດ້ເອົາໃຈໃສ່ຄຸ້ມຄອງ, ສ້ອມແປງ ແລະ ຟື້ນຟູເສັ້ນທາງຫຼວງແຫ່ງຊາດ, ເສັ້ນທາງທ້ອງຖິ່ນ, ເສັ້ນທາງໃນຕົວເມືອງ ແລະ ຊົນນະບົດ ທີ່ຖືກເປ້ເພຈາກໄພທໍາມະຊາດ ສາມາດສັນຈອນໄປໄດ້ປົກກະຕິ; ການຂະຫຍາຍຕາໜ່າງໄຟຟ້າອອກສູ່ເຂດຊົນນະບົດຫ່າງໄກສອກຫຼີກໄດ້ 94 % ຂອງຈຳນວນບ້ານໃນທົ່ວແຂວງ, ຄອບຄົວໄດ້ຊົມໃຊ້ໄຟຟ້າ 97 % ຂອງຄອບຄົວທັງໝົດ, ໄດ້ປັບປຸງກົນໄກການປະສານງານຂອງບັນດາຂະແໜງການກ່ຽວຂ້ອງໃນການຄຸ້ມຄອງການຂຸດຄົ້ນ ປຸງແຕ່ງ ແລະ ສົ່ງອອກບັນດາແຮ່ທາດ ໄດ້ເຂົ້າສູ່ລະບຽບກົດໝາຍຢ່າງເຂັ້ມງວດ.
ເຂດເສດຖະກິດພິເສດ ແຂວງສະຫວັນນະເຂດ ໄດ້ມີບໍລິສັດມາຈົດທະບຽນລົງທຶນ ຈຳນວນ 95 ບໍລິສັດ, ມີມູນຄ່າການລົງທຶນທັງໝົດ 354 ລ້ານໂດລາສະຫະລັດ, ສາມາດສ້າງວຽກເຮັດໃຫ້ປະຊາຊົນໄດ້ 2ພັນ 626 ຄົນ, ໄດ້ສ້າງແຜນຍຸດທະສາດການຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມແບບຮອບດ້ານຂອງແຂວງ ຕາມທິດສີຂຽວ ແລະ ຍືນຍົງ, ເອົາໃຈໃສ່ຈັດສັນສໍາຫຼວດວັດແທກ ແລະ ອອກໃບຕາດິນ, ຄຸ້ມຄອງການເຊົ່າສໍາປະທານທີ່ດິນຕາມລະບຽບກົດໝາຍ.
ຂົງເຂດວັດທະນະທໍາ-ສັງຄົມ ໄດ້ສຸມໃສ່ປະຕິບັດເປົ້າໝາຍການພັດທະນາແບບຍືນຍົງ, ຍຸດທະສາດການສຶກສາ ແລະ ນະໂຍບາຍການສຶກສາເຊິ່ງມີຜົນສໍາເລັດບັນລຸໄດ້ຕາມຄາດໝາຍໃນຫຼາຍດ້ານ, ອັດຕາການເຂົ້າຮຽນຂອງນັກຮຽນແຕ່ລະຊັ້ນເພີ່ມຂຶ້ນ, ອັດຕາການປະລະການຮຽນ ແລະ ຄ້າງຫ້ອງຫຼຸດລົງ; ອັນພົ້ນເດັ່ນ: ແມ່ນປະກາດຈົບຊັ້ນປະຖົມ ແລະ ຈົບຊັ້ນມັດທະຍົມຕົ້ນບໍາລຸງໄດ້ໃນທົ່ວແຂວງ, ປັດຈຸບັນຕາໜ່າງການສຶກສາກວມ 100% ເດັກໃນເກນອາຍຸໄດ້ເຂົ້າຮຽນເປັນສ່ວນຫຼາຍ, ປະຕິບັດແຜນຍຸດທະສາດ ແລະ ນະໂຍບາຍ ຕິດພັນກັບການປັບປຸງຄຸນນະພາບການບໍລິການ ຂອງຂະແໜງການສາທາລະນະສຸກໃນທຸກຂັ້ນ. ພ້ອມນັ້ນກໍໄດ້ຍົກໃຫ້ເຫັນວຽກງານຂົງເຂດບໍລິຫານລັດ, ນິຕິບັນຍັດ, ຕຸລາການ ແລະ ຍຸຕິທຳ, ແນວລາວສ້າງຊາດ, ອົງການຈັດຕັ້ງມະຫາຊົນ, ຂົງເຂດວຽກງານພົວພັນຕ່າງປະເທດ, ວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດ ໄດ້ສຸມໃສ່ປະຕິບັດຕາມດໍາລັດ 348/ລບ ປະເມີນບ້ານພົ້ນທຸກໄດ້ 566 ບ້ານ, ເທົ່າກັບ 55% ຂອງຈໍານວນບ້ານທັງໝົດ.
ອັນພົ້ນເດັ່ນ: ການແກ້ໄຂຄວາມທຸກຍາກ ຂອງປະຊາຊົນບ້ານຄໍາປ່າແໜ ເມືອງຊົນນະບູລີ ໂດຍການມີສ່ວນຮ່ວມຂອງ ທ່ານ ເກຍ ອູ່ສິດທິເດດ ເຈົ້າຂອງໂຮງງານນ້ຳດື່ມ ແລະ ນ້ຳກ້ອນໂລມາຄຳ,ປັດຈຸບັນກຳລັງສຸມໃສ່ແກ້ໄຂຄວາມທຸກຍາກຂອງປະຊາຊົນ ເຂດຈຸດສຸມຕັງອາໄລ ເມືອງນອງ ໂດຍການມີສ່ວນຮ່ວມຂອງ } ໂຄງການຮ່ວມໃຈສາຍໄຍໂລມາຄຳ ~ ເຊິ່ງໂຄງການດັ່ງກ່າວແມ່ນການຮ່ວມທຶນຈາກ ທ່ານ ເກຍ ອູ່ສິດເດດ ແລະ ທ່ານ ສາຍສະໝອນ ກວານເມືອງຈັນ ເພື່ອພັດທະນາທ້ອງຖິ່ນດັ່ງກ່າວໃຫ້ຫຼຸດພົ້ນຈາກຄວາມທຸກຍາກຢ່າງເປັນຮູບປະທຳ.
ຂ່າວ-ພາບ: ນັກປະພັນ-ນັກສິລະປິນ ຖີ່ນສະຫວັນ
ความคิดเห็น